Abdomeni akut karakterizohet nga dhimbje të menjëhershme, të forta dhe të vazhdueshme në nivelin e të gjithë barkut ose vetëm në fund të barkut. 

Në origjinën e një abdomeni akut (dhimbjes së menjëhershme dhe të fortë të barkut) mund të jenë sëmundje të ndryshme, si:

• Inflamacionet e organeve të ndryshme të barkut, si ato të pankreasit (pankreatiti), fshikëzës së tëmthit (kolecistiti), zorrës së hollë (enteriti), zorrës së trashë (koliti), stomakut (gastriti), mitrës dhe vezoreve (adneksiti).
• Shpimi i ulçerave të stomakut dhe të zorrës si dhe të organeve të inflamuara (fshikëza e tëmthit).
• Bllokimi i organeve kavitare (zgavrore), siç janë zorrët dhe fshikëza e tëmthit, kryesisht nga gurët e tëmthit.
• Bllokimi ose çarja e enëve të gjakut
• Dëmtimet e organeve të barkut, që shoqërohen me hemorragji në zgavrën e barkut. 
• Shtatzania abdominale (në zgavrën e barkut)
• Helmimet e ndryshme

Gjithashtu, abdomeni akut mund të shkaktohet edhe nga sëmundje të tjera, që nuk janë të lidhura me organet e zgavrës së barkut. Si të tilla mund të përmendim: infarktin e miokardit, embolinë në mushkëri, dëmtimet e shtyllës kurrizore, gurët e veshkave dhe mbajtja e urinës në rastin e uljes së funksionit të veshkave.  

Në rastin e abdomenit akut (dhimbjes së menjëhershme dhe të fortë të barkut) është i domosdoshëm fillimi i menjëhershëm i trajtimit mjekësor. Kjo për faktin se simptomat e tij përfshijnë të gjithë organizmin, duke rënduar menjëherë gjendjen e përgjithshme të pacientit. Këto simptoma janë:

• Dhimbjet e barkut të forta dhe të vazhdueshme, që fillojnë në mënyrë të menjëhershme.
• Barku i fortë, për shkak të tensionimit ose tkurrjes së muskujve të tij.
• Çrregullim i funksionit të zorrëve (mbajtje e feçeve)
• Gjendje e përgjithshme e keqe e pacientit
• Në rastin e hemorragjive të brendshme, mund të shfaqen gjendjet e shokut, të cilat shkaktojnë çrregullime në qarkullimin e gjakut, deri në humbjen e ndërgjegjes.
• Shpesh, të përziera dhe të vjella.
• Temperaturë (jo gjithmonë).
  

Kujdes: në rastet kur dyshohet për një abdomen akut, nuk duhet të përdoren pa rekomandimin e mjekut medikamente që qetësojnë dhimbjet (antialgjikët).

• Njohja e mjekut në mënyrë të detajuar me simptomat e pacientit.
• Ekzaminimi i barkut nëpërmjet prekjes (palpacionit), ku barku rezulton tepër i fortë.
• Dhimbjet, që mund të jenë të përhapura në të gjithë barkun, ose të përqëndruara në një zonë të veçantë të tij.
• Dëgjimi me stetoskop (auskultacioni) i zhurmave dhe lëvizjeve të zorrëve.
• Analiza e materialeve ushqimore të vjella (kur ka)
• Ekografia e barkut
• Radiografitë e barkut dhe të kraharorit.
• Skaneri i barkut dhe ekzaminimi endoskopik i zorrëve (që eksploron zorrët në brendësi të tyre dhe mundëson marrjen e materialit për biopsi), në rastet kur janë të nevojshme.

• Inflamacion të pankreasit (pankreatiti)
• Inflamacion të zorrëve të holla (enteriti)
• Inflamacion të fshikëzës së tëmthit (kolecistiti)
  

Në rastin e dobësimit të qarkullimit të gjakut, kur pacienti rrezikon të kalojë në gjendje shoku nga rënia e tensionit arterial dhe pulsi është i shpejtë, duhet të kryhet sa më shpejt ndërhyrja kirurgjikale. 

• Inflamacionet dhe nekrozat (vdekjet) e indeve nga mosfurnizimi me gjak i tyre.
• Bllokimi i zorrëve dhe shpimi i tyre, dhe më pas shpërndarja e mikrobeve në zgavrën e barkut, që shkakton septiceminë (kalimin e infeksionit në gjak).
• Përdredhja e një pjese të zorrës së hollë ose bllokimet e enëve të gjakut, që çojnë në vdekje (nekrozë) të indeve, si pasojë e mosfurnizimit me gjak. 
• Dëmtimet ose çarjet e enëve të gjakut, me gjendjen e shokut (uljen e vëllimit të gjakut) që mund të shkaktojë vdekjen e pacientit.