Gjendrat paratiroide janë 4, në formën e thjerrëzave, të vendosura në pjesën e përparme të qafës, në katër polet e gjendrës tiroide. Ato prodhojnë hormonin e paratiroides (PTH), i cili rregullon nivelin e kalciumit në organizëm, duke mos lejuar rënien e tij. 

Hipoparatireoza përfaqëson uljen e funksionit të gjendrave paratiroide, që reflektohet me uljen e nivelit të PTH dhe, për pasojë, edhe të nivelit të  kalciumit në gjak. 

Në pjesën më të madhe të rasteve, hipoparatireoza shkaktohet nga heqja pa dashje e gjendrave paratiroide gjatë ndërhyrjes kirurgjikale për heqjen e tiroides (tiroidektomia), pra nga një gabim mjekësor. Për këtë arsye, sa herë që mjeku kirurg kryen këtë tip operacioni, duhet të jetë mjaft i kujdesshëm në ruajtjen e gjendrave paratiroide të paprekura. Por gjithsesi, meqenëse ato gjenden shumë pranë gjendrës tiroide, kjo nuk është gjithmonë e mundur.

• Rrezatimi i qafës
• Sëmundjet autoimune, me antitrupa që luftojnë qelizat e paratiroides dhe i shkatërrojnë ato.
• Mungesa e theksuar e magneziumit, për periudha të gjata kohore. 
  

• Shqetësimi kryesor i pacientit në këtë rast janë ngërçet muskulare në fytyrë, në krahë ose në këmbë, të shkaktuara nga mungesa e kalciumit në gjak. Ato mund të zgjasin nga disa minuta deri në disa orë.
• Tendosja e muskujve të organeve të tjera si mushkëria, zorra, fshikëza e urinës, mund të shkaktojë  përkatësisht vështirësi në frymëmarrje, diarre ose një dëshirë të shpeshtë për të urinuar.
• Mpirja në parakrahë, në duar ose në fytyrë, e shoqëruar me një ndjenjë frike, irritimi ose axhitimi. Ndryshe nga krizat e epilepsisë, gjatë tetanisë nuk ndodh humbje e ndërgjegjes.
• Personat që  vuajnë nga tetania muskulare kanë një pamje të jashtme tipike, që karakterizohet nga duar dhe këmbë të harkuara dhe "goja e peshkut".
• Tregues të tjerë të mungesës së kalciumit janë: rënia e flokëve, katarakti dhe lëkura e thatë. 
  

Diagnoza e hipoparatireozës bazohet tek:

• Informimi i mjekut mbi historinë e fillimit të sëmundjes, simptomat e pacientit, historinë personale lidhur me ndërhyrje kirurgjikale në të kaluarën, sëmundje të tjera autoimune, etj.
• Matja e nivelit të kalciumit në gjak

Egzaminimi trupor

Tendenca për tetani mund të konstatohet me anën e disa egzaminimeve të thjeshta mjekësore:

• Shenja e Cvostek-ut: në rastin e tendencës për tetani, një goditje e lehtë e nervit facial (të fytyrës) në zonën përpara veshit, shkakton një tërheqje  të muskujve (ngërdheshje) në atë anë të fytyrës.
• Shenja e Truso-s: në rastin e tendencës për tetani, shtypja e krahut si psh. në rastin e shtrëngimit të tij me manshetën e aparatit që mat tensionin, provokon një deformim të dorës përkatëse, që njihet si “dora e obstetrit“.

Egzaminime të tjera

• Egzaminimi i syve nga specialisti okulist për të përjashtuar praninë e kataraktit.
• Skaneri ose rezonanca magnetike e kokës për të përjashtuar sëmundje të tjera që mund të shkaktojnë ngërçet muskulare.
  

Trajtimi synon realizimin e qëllimit final, që është normalizimi i nivelit të kalciumit në gjak. Ai konsiston në përdorimin e këtyre medikamenteve:

• Pilulat e vitaminës D dhe kalciumit nga goja.
• Injeksioni me rrugë venoze i kalciumit, në rastet e ngërçeve muskulare.
• Pacientëve me hipoparatireozë u rekomandohen kontrolle të rregullta tek mjeku, me matje të nivelit të kalciumit në gjak.
  

Ndërlikimet shfaqen vetëm në rast se niveli i kalciumit nuk rregullohet në mënyrë korrekte. Në këto raste mund të konstatohen krizat e tetanisë ose katarakti në sy.