Mënyra e transmetimit të virusit

Virusi I Hepatitit C mund të transmetohet nga:

• Kontakti me gjakun e infektuar (si në rastin e personelit mjekësor) 
• Shkëmbimi i shiringave ose ageve gjatë injektimit të drogave të ndryshme 
• Kryerja e marrëdhënieve seksuale me një partner të infektuar me këtë virus
• Transfuzioni i gjakut ose pastrimi i gjakut (dializa), për të cilat rreziku i transmetimit është reduktuar në masë të madhe nga testet paraprake që i kryhen gjakut.
• Kalimi i virusit nga nëna tek fëmija: rrezik shumë i kufizuar
• Kryerja e Tatuve, pirsing  apo shpimeve të lëkurës me materiale jo sterile (rreziku i infektimit mjaft i kufizuar).
• Përdorimi i përbashkët i lenteve të syve ose furçave të dhëmbëve (transmetimi përmes gjakut: rreziku i infektimit mjaft i kufizuar) 

Në rastin e infektimit nga virusi i hepatitit C, hepatiti akut (inflamacioni i mëlçisë) zhvillohet pas rreth 15-150 ditësh, por jo gjithmonë shoqërohet me simptoma klinike. 

Virusi dëmton qelizat e mëlçisë, proçes ky që manifestohet me simptomat e mëposhtme:

• Zverdhja e lëkurës dhe sklerave të syve (e pjesës së bardhë të syve).
• Ethe
• Dobësi e përgjithshme (lodhje, humbje e oreksit, dobësi trupore)
• Neveri për ushqimet
• Me raste, dhimbje e lehtë në shtypje nën brinjët e djathta

Diagnoza e Hepatitit C vendoset duke u bazuar në:

• Historinë e sëmundjes, duke marrë parasysh simptomat e pacientit
• Zbulimin e virusit dhe të antitrupave specifik në gjak
• Matjen e niveleve të enzimave të mëlçisë, që jep informacion për kohëzgjatjen e sëmundjes
• Marrja e materialit indor (biopsia)

Trajtimi i Hepatitit C varet nga forma e tij, akute ose kronike.

Hepatiti C akut

Trajtimi i hershëm me interferon për disa javë shmang kalimin e sëmundjes në formën kronike të saj. Interferonët janë proteina natyrale që ndihmojnë në mbrojtjen e trupit kundër viruseve ose tumoreve. 

Hepatiti C kronik

Interferoni shoqërohet me medikamente virostatike (barna që pengojnë shumëzimin e virusit). Në varësi të ashpërsisë së sëmundjes, ky trajtim është efektiv në 50-80% të pacientëve.

Në fazën përfundimtare të cirrozës së mëlçisë, ndonjëherë mund të jetë i nevojshëm transplantimi i mëlçisë.

Këshilla

Në rast se dyshoni për infektim nga virusi i Hepatitt C, konsultohuni menjëherë me mjekun. Fillimi i sëmundjes është më i lehtë për t’u trajtuar, pasi mjekimi është më efikas. 

Në rastin e hepatitit C kronik, pacientët mbeten infektues, edhe nëse ndjehen përsëri të shëndetshëm pas disa javësh nga fillimi i trajtimit. 

Në gati 80% të pacientëve, sëmundja paraqet një evolucion kronik. Në fillim, pacientët vazhdojnë të ndihen relativisht mirë. Në 20% të pacientëve, hepatiti kronik C ndërlikohet me cirrozën e mëlçisë pas rreth 20 vjetësh. Gjithashtu, mund të rezultojë edhe në kancer të mëlçisë.

• Mos i shkëmbeni me të tjerët shiringat që përdorni për injektim të medikamenteve apo drogave, as briskun e rrojes dhe as furçën e dhëmbëve
• Kryeni marrëdhënie seksuale të mbrojtura
• Personeli mjekësor duhet të respektojë masat e higjienës në ambientet ku ushtron profesionin, për të mbrojtur veten dhe pacientët.