Tumoret stromale të aparatit të tretjes janë sëmundje kanceroze (malinje) të traktit digjestiv. Ata janë më të rrallë se format e tjera të kancerit, të tilla si kanceri i stomakut dhe i zorrës së trashë.

Këto tumore formohen direkt në muret e organit të tretjes dhe për këtë arsye konsiderohen  tumore të indeve të buta (ose sarkoma). Ato mund të shfaqen kudo në traktin e tretjes, nga ezofagu deri në fund të zorrës së trashë. Megjithatë, janë më të shpeshta në zorrë. Në përgjithësi, pacientët e prekur nga këto tumore janë nga 55-65 vjeç, ku dominojnë meshkujt.

Përgjegjës për shfaqjen e një tumori të aparatit tretës është mungesa e një geni. Në njerëz të shëndetshëm, rritja e qelizave të traktit gastrointestinal rregullohet nga një enzimë e quajtur tirozinkinazë. Kur geni mungon kjo enzimë aktivizohet vazhdimisht, gjë që shkakton shumëzimin e pakontrolluar të qelizave, që çon në shfaqjen e tumorit. 

Në raste të rralla, një tumor i tillë mund të shfaqet edhe pa këtë mutacion gjenetik. Megjithëse modifikimi gjenetik është i pranishëm në shumicën e pacientëve, këto tumore nuk transmetohen gjenetikisht. Në përgjithësi, ky modifikim gjenetik (mutacion) ndodh gjatë jetës.

Për fat të keq në shumë raste një tumor i tillë i traktit tretës shkakton simptoma vetëm në fazën e avancuar të sëmundjes. Këto simptoma nuk janë specifike, pasi mund të shfaqen edhe gjatë sëmundjeve të tjera. Të tilla simptoma janë të përzierat, dhimbjet, humbja e oreksit, kapsllëku, ose gjakderdhja e brendshme. Kjo është arsyeja pse këto tumore shpesh zbulohen rastësisht, për shembull gjatë një fibrogastro/kolonoskopie ose para një operacioni kirurgjikal.

Nëse tumori i aparatit tretës zbulohet në një fazë të hershme, zakonisht mund të hiqet me rrugë kirurgjikale. Megjithatë, në shumë raste tumori i sapo zbuluar ka arritur tashmë një masë të madhe dhe është përhapur në organe të tjera, pra ka lëshuar metastaza. Në të tilla raste operacioni  është i pamundur. Përveç kësaj, kjo formë e avancuar e kancerit është shumë rezistente ndaj kimioterapisë dhe radioterapisë, dhe shpesh ka rezultuar ndër tumoret më të vështira për t'u trajtuar.

Sot po përdoret me sukses të madh një gjeneratë e re medikamentesh (frenuesit e tirozinkinazës). Këto barna veprojnë mbi enzimën përgjegjëse për rritjen e qelizave kanceroze, duke ndaluar ose pakësuar kështu rritjen e këtyre qelizave dhe të masës tumorale.