Fimoza përfaqëson një ngushtim të unazës së lafshës së penisit (lëkurës që mbulon kokën e  penisit) që pengon zbulimin e kokës së  penisit (organit të jashtëm mashkullor).
 
Njihen dy forma të fimozës: forma e plotë dhe ajo e pjesshme.

• Në rastin e fimozës së plotë, zbulimi i kokës së  penisit është i pamundur, madje edhe në mungesë të ereksionit.
• Në rastin e fimozës së pjesshme, zbulimi i kokës së  penisit është i mundur në prani të një ereksioni.
  

Shkaqet e fimozës janë:

• Të lindura (fimoza kongenitale)
• Skleroza që ndodh pas traumatizimeve lokale
• Dytësore, si pasojë e infeksioneve. 
  

Një mashkull me fimozë paraqet:

• Çurg urinar të hollë
• Skuqje dhe enjtje të penisit (organit të jashtëm mashkullor)
• Dhimbje gjatë urinimit
  

Diagnoza e fimozës vendoset nga mjeku specialist urolog ose ai androlog, nëpërmjet egzaminimit trupor të pacientit (organit të jashtëm seksual të tij).

Trajtimi i fimozës varet drejtpërdrejt nga mosha e pacientit në momentin e diagnostikimit.

Nëse fimoza konstatohet gjatë viteve të para të jetës, trajtimi nevojitet vetëm kur pengohet urinimi.

Në të gjitha rastet e tjera, mjeku kryen një  prerje të unazës së lafshës vetëm kur fëmija arrin moshën 4-5 vjeç.

Në këtë stad, janë të mundshme dy mënyra të trajtimit kirurgjikal:

• Mënyra e parë konsiston në rindërtimin e lafshës së kokës së penisit, ku gjatë ndërhyrjes  hiqet vetëm unaza e lafshës. Përparësia e madhe e kësaj metode qëndron në faktin që ruhet lafsha e paprekur.
• Mënyra e dytë konsiston në heqjen e plotë të lafshës, me ekspozimin e plotë të kokës së penisit. Kjo proçedurë përdoret shpesh për qëllime fetare (syneti).   

Tek fëmijët me moshë nën 3 vjeç, fimoza është praktikisht fiziologjike (normale). Për këtë arsye, në këto raste nuk është e nevojshme ndërhyrja kirurgjikale.

Ngushtimi i unazës së lafshës (fimoza) rrit shkallën e rrezikut për zhvillimin e infeksioneve. Kjo pasohet nga çrregullime të proçesit të urinimit, që  reflektohen me mbajtje të menjëhershme të urinës (pamundësi për të urinuar).
Në rastin e fimozës, duhet  të evitohet gjithmonë zbulimi i dhunshëm, pra me forcë i kokës së penisit (organit të jashtëm mashkullor), pasi  në këtë rast mund të shfaqet parafimoza. Kjo e fundit  shkakton enjtje të kokës së penisit dhe ngjyrosje në blu të saj. Parafimoza përfaqëson një situatë të rëndë mjekësore, që ka nevojë për ndërhyrje kirurgjikale të menjëhershme.