Tumoret beninje të kockave përfaqësojnë shumëfishimin e qelizave në brendësi dhe, më rrallë, në sipërfaqe të kockës. Ato zakonisht e kanë origjinën në indin kockor, indin kërcor dhe atë lidhor. Meqenëse shpesh ato nuk shkaktojnë shqetësime tek pacienti, zbulimi i tyre është përgjithësisht i rastësishëm.

Është tepër e rëndësishme të bëhet dallimi i këtyre tumoreve beninje nga kanceri (tumori malinj) i kockës. Pjesa më e madhe e tumoreve kockore janë beninje dhe zhvillohen gjatë periudhës së dytë ose të tretë të jetës, ndryshe nga tumoret malinje që zhvillohen gjatë periudhës së rritjes.

Shkaku i zhvillimit të tumoreve beninje të kockës nuk është ende i njohur. Mendohet se, përveç trashëgimisë, në këtë drejtim luajnë rol edhe faktorët fizikë dhe ata kimikë. Në varësi të origjinës së tumorit, njihen grupe të ndryshme tumoresh, me përfaqësuesit e tyre kryesorë si më poshtë:

• Tumoret me origjinë nga qelizat kockore: osteoma, osteoma osteoide dhe osteoblastoma.
• Tumoret me origjinë nga indi kërcor: kondroma, kondroblastoma dhe osteokondroma.
• Tumoret me origjinë nga indi lidhor: fibroma kockore dhe osteoklastoma (tumori me qeliza gjigande)
• Tumoret me origjinë nga indi i enëve të gjakut: hemangioma kockore.

Shpesh, pacienti me tumor beninj të kockës nuk paraqet simptoma (shqetësime).

• Ndonjëherë, shfaqen dhimbje të përhapura, vetëm natën ose në rast sforcimi fizik.
• Ndonjëherë konstatohet enjtje në zonën e tumorit dhe nxehtësi lokale.
• Ndonjëherë shfaqen dhimbje që përhapen.
• Prania e ndërlikimeve, që manifestohen me paraliza ose me thyerje të kockave.

Diagnoza e tumorit beninj të kockave bazohet në:

• Simptomat e pacientit dhe historinë e fillimit të tyre
• Egzaminimin trupor të pacientit nga mjeku specialist ortoped, me palpacionin (prekjen) e gjymtyrës së prekur.
• Radiografinë në dy projeksione të segmentit kockor të prekur.
• Nëse janë të nevojshme, rekomandohet edhe kryerja e skanerit, rezonancës magnetike, angiografisë (që evidenton enët e gjakut) ose ekografisë.
• Biopsinë e tumorit të hequr nëpërmjet operacionit, për të përjashtuar praninë e qelizave malinje në të.

Një tumor kockor beninj që nuk shkakton shqetësime dhe nuk kërcënon qëndrueshmërinë e kockës, përgjithësisht ka nevojë për trajtim vetëm në rast se ka shkaktuar ndërlikime (shih më poshtë). Shndërrimi i këtyre tumoreve në kancer (tumor malinj) të kockës është një fenomen mjaft i rrallë.

Kur tumoret beninje të kockave shkaktojnë shqetësime (simptoma), trajtimi është i domosdoshëm dhe ka për qëllim që të qetësojë dhimbjet dhe të ruajë një kockë të qëndrueshme dhe funksionale. Në përgjithësi, trajtimi është kirurgjikal, dhe konsiston në heqjen e tumorit dhe zëvendësimin e fragmentit kockor të hequr me ind kockor të vetë pacientit ose me transplant të kockës.

Në pacientët me tumor beninj të kockave, ndërlikimet mund të jenë pasojë e tumorit vetë, ose e ndërhyrjes kirurgjikale për heqjen e tij.

Ndërlikimet e shkaktuara nga tumori:

• Kufizimi i funksionit të gjymtyrës së prekur, si pasojë e dhimbjes.
• Thyerje të kockave
• Çrregullime nervore (kryesisht paraliza), kur tumori prek edhe indin nervor.

Ndërlikimet e shkaktuara nga ndërhyrja kirurgjikale:

• Ndërlikime të përgjithshme, të tilla si: hemorragji, infeksione, vonesë në mbylljen e plagës (formimin e cikatrices), tromboza venoze.
• Pabarazi e gjatësisë së këmbëve
• Pseudoartrozë.