Tendinet janë fije që lidhin muskulin me kockën, ndërsa ligamentet janë fije që lidhin kockat ndërmjet tyre. Tendinet që realizojnë përkuljen e gishtave kalojnë në kanalet që të çojnë deri në nivelin e ligamenteve unazore, të fiksuara në nivelin e kockave ose të gishtave. Sëmundja De Quervain është një dukuri që shfaqet kur indi i kanalit tendinoz të muskujve përkulës të gishtave trashet dhe e bën shumë të vështirë kalimin e kanalit deri në nivelin e ligamenteve unazore kur gishtat janë të shtrirë.

Në këtë rast, gishti i prekur mund të zgjatet ose duke ushtruar presion ose duke e ndihmuar atë me dorën tjetër. Indi i trashur rifutet në ligamentin unazor, duke shkaktuar dhimbje në nivelin e gishtit. Më shpesh nga ky fenomen preken gishti i pare (i madhi), i tretë dhe i katërt (i unazës)

Shkaku i vërtetë i sëmundjes De Quervain nuk është ende i njohur. Lidhur me zhvillimin e saj dyshohet se ndikojnë situata të ndryshme mjekësore, si psh. ndryshimet indore me origjinë hormonale, guta, diabeti i sheqerit dhe sëmundje të tjera metabolike, si dhe sëmundjet kronike si poliartriti reumatizmal (i lidhur me gjendje të ndryshme mjekësore). Gjithashtu, rreziku i shfaqjes së saj rritet nga ushtrimi në mënyrë të rregullt i një presioni mbi gisht, si psh. gjatë përdorimit të gërshërëve, kaçavidave ose mjeteve të tjera.

Pacienti me sëmundjen De Quervain paraqet këto simptoma:

• Në fillim, dhimbje përgjithësisht të lehta në nivelin e karpit (kockës ku mbështetet gishti).
• Më pas, gishti mbetet i bllokuar në pozicionin e përkulur, kur gishtat e tjerë janë të shtrirë.
• Shfaqja e zonave të enjtura, të rrumbullakta (si kokrra) në nivelin e tendinit të prekur.

 

Diagnoza e sëmundjes De Quervain përcaktohet nga mjeku specialist ortoped ose reumatolog, duke u bazuar në:

• Njohjen e tij në mënyrë të detajuar me historinë e sëmundjes dhe simptomat e pacientit.
• Egzaminimin e gishtit të prekur nga sëmundja, në pozicionin e përkulur dhe të shtrirë, që përgjithësisht i lejon mjekut të vendosë diagnozën.
• Kryerjen e radiografisë, që e ndihmon mjekun të përjashtojë shkaqe të tjera të lidhura me kockat e gishtit përkatës.

 

Fillimisht, mjeku duhet të informohet dhe të marrë në konsideratë shkaqet e mundshme, që mund të kenë favorizuar sëmundjen De Quervain. Si të tilla konsiderohen: ndryshimi i zakoneve, mënyra sesi mbahen mjetet e ndryshme, trajtimi i diabetit të sheqerit, guta dhe poliartriti reumatizmal.

Sëmundja De Quervain mund të shkaktojë këto ndërlikime:

• Bllokimin (ngecjen) e gishtit në pozicionin e përkulur.
• Çrregullime funksionale të nervave dhe enëve të gjakut në gishtin e prekur.
• Ndërlikime pas operacionit, që përfshijnë: vonesën në shërimin e plagës, infeksionet e plagës operatore , dëmtimet e nervave të vegjël dhe enëve të gjakut, si dhe ngjitjet në nivelin e kanalit tendinoz, në rastet e qëndrimit të gishtit pa lëvizur për një periudhë të gjatë kohore pas operacionit.