Tendinet (që lidhin muskulin me kockën) rrethohen nga një këllëf sinovial, i cili përbëhet nga ind lidhor, është i mbushur me një likid lubrifikues dhe rrethon tendinet si një tub. Në rastin e përdorimit të tepruar të një kyçi të caktuar, për një periudhë të gjatë kohore, zhvillohen dëmtime të vogla në zonat e tendinit që i nënshtrohen fërkimit. Kjo çon në zhvillimin e një inflamacioni lokal. Në raste të rralla, mund të shfaqet tenosinoviti i provokuar nga infeksione bakteriale.

Teorikisht, tenosinoviti mund të prekë të gjitha kyçet. Gjithsesi, kyçi i dorës preket më shpesh se të tjerët.

Tenosinoviti është një sëmundje tepër e dhimbshme dhe e vështirë, që çon në paaftësi të zgjatur për punë. Personat që kryejnë aktivitete të përsëritura me një kyç të caktuar, janë më të rrezikuar për të zhvilluar tenosinovit. Sa më herët të trajtohet tenosinoviti, mundësisht sapo të shfaqen simptomat e para, aq më shpejt shërohet ai.

 

Tenosinoviti shkaktohet nga trashja e murit të brendshëm të këllëfit sinovial, që është rezultat i përdorimit të përsëritur dhe të vazhdueshëm të një kyçi. Në rastet e dëmtimeve të vogla, muri i brendshëm i këllëfit sinovial bëhet i ashpër, duke favorizuar një inflamacion në atë nivel.

Në raste të rralla, në origjinën e një tenosinoviti mund të jetë një sëmundje inflamatore e kyçeve. Gjithashtu, inflamacionet me natyrë infeksioze ndodhin pothuajse vetëm pas plagosjeve, të tilla si pickime, kafshime, prerje, etj.

Më të rrezikuar për të zhvilluar tenosinovit janë:

• Personat që merren me pastrim
• Personat që shtypin shumë në tastierën e kompjuterit ose që luajnë shumë me lojra në kompjuter.
• Kopshtarët dhe kultivuesit
• Motoçiklistët
• Muzikantët
• Personat që praktikojnë kanotazhin
• Masazhuesit
  

Sëmundja manifestohet në mënyrë tipike me dhimbje të forta, që shfaqen fillimisht vetëm gjatë lëvizjeve dhe më pas edhe në qetësi (natën).

Simptoma të tjera:

• Ndjesia e nxehtësisë në zonën e prekur
• Enjtje dhe skuqje
• Dhimbje në shtypje
• Zhurma e kërcitjes në tendinin e prekur
• Mund të preken kokrra në kyçin e dorës
   

Diagnoza e tenosinovitit përcaktohet nga mjeku specialist ortoped, duke u bazuar në:

• Historinë e sëmundjes dhe simptomat e pacientit. Është e detyrueshme të përmenden të gjitha aktivitetet e kryera në mënyrë të përsëritur.
• Zhurma që dëgjohet gjatë lëvizjeve i mjafton përgjithësisht mjekut për të vendosur diagnozën.
• Radiografia e kyçit të prekur
• Analizat e gjakut, për të evidentuar një inflamacion ose një sëmundje reumatizmale.

 

Për të parandaluar një tenosinovit të vazhdueshëm, me një ecuri të gjatë dhe të dhimbshme, që shkakton paaftësi për punë, ai duhet të trajtohet sapo shfaqen simptomat e para.

Për disa forma kronike të tenosinovitit, është praktikisht e pamundur të lehtësohet pacienti. Për shkak të lidhjes së drejtpërdrejtë me aktivitetet e përsëritura, të realizuara me një kyç të caktuar, tenosinoviti mund të konsiderohet sëmundje profesionale. Për pasojë, pacientëve u rekomandohet ndryshimi i profesionit ose përdorimi i një instrumenti ose pajisjeje ndihmëse. Në rastin e përsëritjeve të tenosinovitit, mund të jenë të nevojshme edhe këshillimet me një psikanalist.

Nëse është e pamundur të evitohet kryerja e aktiviteteve të përsëritura me kyçin e dëmtuar, vendi i punës duhet të rregullohet në mënyrë sa më të rehatshme dhe më praktike të mundshme. Kështu, duhet të përshtatet lartësisia e karriges dhe tavolinës (për të shmangur presionin mbi duar), pozicioni i tastierës së kompjuterit për të shmangur vendosjen e duarve në pozicion të papërshtatshëm. Është përgjithësisht e rëndësishme të bëhen pushime të shkurtra gjatë punës dhe të kryhen ushtrime të rregullta çlodhëse për duart.