Testi i tolerancës ndaj laktozës
Kontribuesit (Dr. med. Fritz Grossenbacher, Doris Zumbühl, Dr. Yllka Themeli)
Çfarë është testi i tolerancës ndaj laktozës?
Testi i tolerancës ndaj laktozës shërben për të evidentuar një intolerancë ndaj laktozës (sheqeri i qumështit). Nëpërmjet tij verifikohet nëse zorra mund ta thithë laktozën e ushqimit, e cila zbërthehet në zorrën e hollë prej enzimës laktazë. Kjo kontrollohet gjatë testit për matjen e sheqerit në gjak, pas marrjes së një solucioni me laktozë.
Testi frymëshkëmbyes me hidrogjen (testi respirator me H2) përdoret më shpesh për evidentimin e intolerancës ndaj laktozës, sepse është më i saktë dhe nuk ka nevojë për përsëritje të matjes së sheqerit në gjak në mollëzën e gishtit. Shpesh, këto dy teste realizohen së bashku.
Testi i tolerancës ndaj laktozës është një ekzaminim i fushës së Gastro-Hepatologjisë, që është degë e Mjekësisë së brendshme.
A nevojitet ndonjë përgatitje e veçantë përpara këtij testi?
Testi i tolerancës ndaj laktozës kryhet në gjendjen esëll, pra pacienti nuk duhet të ketë konsumuar ushqim rreth 6 orë përpara.
Çfarë duhet të sqarohet përpara këtij testi?
Asnjë sqarim i veçantë nuk është i nevojshëm përpara testit të tolerancës ndaj laktozës.
Si realizohet ky test?
Fillimisht, matet niveli i sheqerit në gjak nëpërmjet shpimit në mollëzën e një gishti të dorës (gishti i katërt), dhe vlera shënohet për ta krahasuar më pas me vlerat e tjera. Pas pirjes së një solucioni me laktozë, matet përsëri niveli i sheqerit në gjak, çdo 30 minuta përgjatë 2 orëve. Në rastin e mungesës së laktazës (intolerancë ndaj laktozës), niveli i sheqerit në gjak nuk rritet ose rritet pak, pasi sheqeri që përmbahej në solucionin që u pi nuk u thith në zorrën e hollë. Nëse niveli i sheqerit rritet me më shumë se 20 mg/dl (krahasuar me vlerën fillestare), përjashtohet mungesa e laktazës, pra personi nuk ka intolerancë ndaj laktozës.
Kur përdoret ky test?
Testi i tolerancës ndaj laktozës shërben për diagnostikimin e intolerancës ndaj laktozës dhe kryhet tek personat me çrregullime të tretjes të dyshimta për këtë problem.
Arsyet e shpeshta për kryerjen e Testit të tolerancës ndaj laktozës janë:
- Diagnostikimi i intolerancës ndaj laktozës
- Fryrjet e barkut
- Diarrea
- Dhimbjet e barkut
A paraqet rreziqe ose efekte të padëshiruara ky test?
Testi i tolerancës ndaj laktozës është përgjithësisht i parrezikshëm. Në prani të intolerancës ndaj laktozës, disa orë pas testit mund të shfaqen çrregullimet përkatëse, për shkak të solucionit të laktozës të përthithur në zorrën e hollë. Të tilla janë: fryrja e barkut, diarrea, dhimbjet e barkut. Shpimet e përsëritura në mollëzën e gishtit për matjen e nivelit të sheqerit në gjak mund të jenë të dhimbshme, por meqenëse ato bëhen në anë të mollëzës, janë më pak të dhimbshme sesa në mes saj.