Çfarë është shintigrafia e mushkërive?

Shintigrafia e mushkërive është një ekzaminim që shërben për vlerësimin e furnizimit me gjak (perfuzionit) dhe funksionit të mushkërive. Për të kryer këtë ekzaminim, administrohet një substancë lehtësisht radioaktive, që grumbullohet në mushkëri. Më pas përftohen imazhet e mushkërive, duke përdorur një aparat të veçantë.

Shintigrafia e mushkërive është një ekzaminim i Mjekësisë bërthamore.

A kërkon ky ekzaminim ndonjë përgatitje të veçantë?

Shintigrafia e mushkërive mund të kryhet pa asnjë përgatitje të veçantë.

Çfarë duhet të sqarohet para shintigrafisë së mushkërive?

Ky ekzaminim mund të kryhet edhe në gratë shtatzëna, por doza e substancës radioaktive në të tilla raste është më e vogël. Përveç kësaj, asnjë sqarim i veçantë paraprak nuk është i nevojshëm.

Si kryhet shintigrafia e mushkërive?

Për të vlerësuar funksionimin e mushkërive, një sasi e vogël ajri lehtësisht radioaktiv thithet në disa frymëmarrje radhazi. Në të njëjtën kohë, me ndihmën e një aparati të veçantë përftohen imazhet e mushkërive, që shfaqen në një kompjuter në formën e imazheve tre-dimensionale të ajrosjes së mushkërive (shintigrafia e ventilimit - ajrosjes). Më pas, në një venë të krahut injektohet një sasi e vogël e substancës lehtësisht radioaktive, që arrin shpejt në mushkëri nëpërmjet gjakut. Një kamera speciale regjistron dhe mundëson në kompjuter imazhe tre-dimensionale të furnizimit me gjak të mushkërive (shintigrafia e perfuzionit - furnizimit me gjak).

Kur përdoret shintigrafia e mushkërive?

Shintigrafia e mushkërive vlerëson furnizimin me gjak dhe ajrosjen e mushkërive, pra funksionimin e tyre.

Arsyet e shpeshta për kryerjen e shintigrafisë së mushkërive janë:

• Embolia pulmonare, bllokimi i arterieve të mushkërive
• Planifikimi i proçedurave kirurgjikale të mushkërive, gjatë të cilave duhet të hiqen pjesët e mushkërive.

A paraqet shintigrafia e mushkërive rreziqe apo efekte të padëshiruara?

Një reaksion alergjik ndaj substancës radioaktive të administruar është në parim i mundshëm, por shumë i rrallë. Radioskopia e ekspozon pacientin ndaj rrezatimit. Normalisht, shintigrafia e mushkërive nuk kryhet gjatë shtatzënisë. Sipas udhëzimeve të specialistit të Mjekësisë bërthamore, nënat që ushqejnë fëmijën me gji mund të duhet ta ndërpresin dhënien e gjirit për një kohë të shkurtër pas këtij ekzaminimi.