Ektropioni është një gjendje mjekësore, që karakterizohet nga kthimi i qepallës nga jashtë, duke e zbuluar syrin lart ose poshtë, në varësi të qepallës së kthyer. Më shpesh konstatohet ektropioni i qepallës së poshtme tek personat e moshuar. Zbulimi dhe tharja e syrit çon në inflamacione të konjuktivës (pjesës së bardhë të syrit) dhe kornesë (pjesës së tejdukshme të syrit). 

Shkaku më i shpeshtë përgjegjës për ektropionin (kthimin e qepallës nga jashtë) është lëshimi i muskujve dhe tendineve të qepallave. Kjo shoqërohet me ulje të qepallës poshtë dhe kthim të saj për nga jashtë.  

Me të njëjtin mekanizëm ndodh ektropioni edhe në rastin e paralizës së nervit të shtatë të kafkës (nervi facial-i fytyrës), i cili komandon muskujt rrethorë të syrit. Si shkaqe të tjera mund të konsiderohen cikatricet ose atrofitë në nivelin e qepallës, apo ndërhyrjet kirurgjikale estetike të kryera në nivelin e saj.

Pacientët me ektropion (kthim të qepallës nga jashtë) paraqesin simptomat e mëposhtme:

• Lotimi i shprehur
• Kthim joestetik i qepallës nga jashtë
• Në disa raste, ndjesia e pranisë së një trupi të huaj brenda në sy.
• Në rastet e inflamacionit shoqërues: dhimbje dhe skuqje të syrit. 
  

Vendosja e qepallës në pozicion të papërshtatshëm është e dukshme. Për këtë arsye, nuk nevojiten egzaminime shtesë për të vendosur diagnozën e ektropionit. Në rast se është e nevojshme, mjeku mund të kryejë egzaminimin e konjuktivës (pjesës së bardhë të syrit) dhe kornesë (pjesës së tejdukshme të syrit), për evidentimin e ndonjë dëmtimi ose ulçere të mundshme në këto nivele.  Në rast se mjeku dyshon për infeksion, merret material në zonën e dyshuar për konfirmimin e diagnozës. 

Në përgjithësi, trajtimi i ektropionit (kthimit të qepallës nga jashtë) është kirurgjikal. Ai konsiston në tërheqjen e qepallës derisa të vendoset përsëri në pozicion normal dhe të mbulojë kokërdhokun.

Ndërlikimi më i rëndësishëm i ektropionit (kthimit të qepallës nga jashtë) është tharja e syrit, që favorizon infeksionet e konjuktivës (pjesës së bardhë të syrit) dhe kornesë (pjesës së tejdukshme të syrit).