Çfarë është ekoencefalografia?

Ekoencefalografia është një ekzaminim ekografik i brendësisë së kafkës dhe mbi të gjitha i trurit. Ajo përdoret për të identifikuar proçeset ekspansive, të tilla si hemorragjitë, tumoret dhe zgjerimet e ventrikujve (zgavrat e mbushura me lëng) të trurit, si dhe ndryshimet strukturore të indit të trurit.

Duke qenë se valët e ultratingujve mezi i përshkojnë kockat e kafkës, dhe meqenëse janë futur në përdorim metoda më të sakta dhe më moderne të ekzaminimit (si CT-skaneri dhe MRI), përdorimi i ekoencefalografisë tashmë është kufizuar kryesisht në ekzaminimin e të porsalindurve, të lindurve para kohe dhe foshnjave, si dhe në fushën e Neurokirurgjisë.

Ekoencefalografia është një ekzaminim radiologjik.

A kërkon ky ekzaminim ndonjë përgatitje të veçantë?

Ekoencefalografia mund të kryhet pa ndonjë përgatitje të veçantë.

Çfarë duhet të sqarohet para ekzaminimit?

Asnjë element i veçantë nuk duhet të sqarohet para kryerjes së ekoencefalografisë.

Si realizohet ekoencefalografia?

Tek të porsalindurit, të lindurit para kohe dhe foshnjat:

Ekzaminimi zgjat rreth 20 minuta dhe është i padhimbshëm. Pas aplikimit në kokë të xhelit të ngrohur më parë, koka e sondës së ultratingujve vendoset butësisht në kafkë dhe zhvendoset butësisht me lëvizje para-prapa. Gjatë kësaj kohe në ekranin e aparatit të ekografisë shfaqet pamja e trurit. Në sajë të një tipi të veçantë të ekografisë, të quajtur "ekografia duplex", është gjithashtu e mundur të vlerësohet edhe rrjedhja e gjakut në enët e trurit dhe rrjedhja e lëngut truno-shpinor në ventrikujt e trurit.

Tek fëmijët nën 2 vjeç, kockat e kafkës ende nuk janë ngjitur plotësisht. Ndërmjet pllakave të ndryshme kockore gjenden ende hapësira membranore, fontanelat, të cilat forcohen me kalimin e kohës. Meqenëse kockat e kafkës përfaqësojnë një lloj pengese për valët e ultratingujve, ekoencefalografia realizohet kryesisht në nivelin e fontanelave, prandaj edhe emërtohet "ekografia transfontanelare". Ekzaminimi mund të kryhet gjithashtu edhe në nivelin e kockës së hollë temporale.

Në Neurokirurgji:

Gjatë dhe pas operacioneve të trurit, ekzaminimi kryhet në kushte sterile, në kafkën e hapur.

Kur përdoret ekoencefalografia?

Ekoencefalografia është zëvendësuar kryesisht nga tomografia e kompjuterizuar (CT) dhe imazhi i rezonancës magnetike (MRI). Sot, ajo vazhdon të përdoret kryesisht për ekzaminimin dhe monitorimin e të porsalindurve, të lindurve para kohe dhe foshnjave, si dhe gjatë dhe pas proçedurave neurokirurgjikale (operacionet e trurit).

Arsyet e zakonshme për kryerjen e ekoencefalografisë janë:

Tek të porsalindurit, të lindurit para kohe dhe foshnjat:

• Hidrocefalusi: zgjerimi i ventrikujve të trurit të mbushur me lëng
• Hemorragjitë: në tru dhe jashtë trurit, brenda ventrikujve të trurit
• Mungesa e oksigjenit (çon në leucomalacia periventricularis)
• Ngjitja e parakohshme e suturave të kafkës (craniosynostosis)
• Keqformimet e lindura
• Vonesat në rritjen trupore
• Tumoret
• Infeksionet
• Traumat fizike
• Ndjekja e ecurisë së anomalive ose sëmundjeve të njohura

Në Neurokirurgji:

Ekoencefalografia është një ekzaminim i padhimbshëm, i parrezikshëm, që nuk e ekspozon pacientin ndaj rrezatimit, dhe gjithashtu që mund të kryhet në shtratin e tij.